Si malfidanu... Iè, si preparanu... Crederanu ch'o avessi dumandatu di esse ricevutu da pudè fà un culpacciu. Cun ciò chì hè stalvatu, ripensendu ci, ùn ci hè mancu da stupì si ch'elli pensinu cusì... Ci era ancu più chè da suspettà mi. In fatti hè propiu una cunneria. A mi sò cerca cù i mo soldi. Ùn la devia micca fà. Ùn devia micca vene... Oimè ! Mì ch'aghju trasaltatu... Ùn l'averaghju micca dette ad alta voce isse parolle chì venenu è rivenenu è mi tarlanu e cervelle. «?Hè statu più forte chè mè.?» U prublema hè a sulitudine. Bastava di avè pussutu parlà cun qualchissia. Hè sicura chì subitu subitu u mo interlucutore mi avaria dettu di nò. Ùn ci andà vè, chì ti metti ind'a nassa da per tè !Avaria apertu l'ochji ! Invece nò. Sò quì è aspettu. Ùn la mi possu francà.